ಎದೆಗೂಡ ಅಗ್ನಿಪರ್ವತ

ಎದೆಗೂಡಲಿ ಅಗ್ನಿ ಪರ್ವತ ಮುಚ್ಚಿಟ್ಟು
ತಡವರಿಸುತಿರುವೆ ಕತ್ತಲಲಿ ನಾನಿಂದು
ಬೆಳಕಿಲ್ಲದೇ ಅಲ್ಲ
ಬೆಳಕು ಸಲ್ಲದೆ
ಬೆಳಕಿಗೆ ಕಣ್ಣು ತೆರೆಯಲಾರದೆ

ಬಿರುಬೆಳಕು ದರ್ಶಿಸೋ ಸತ್ಯಗಳು
ಬರಿಗಣ್ಣ ಮುಚ್ಚಿಸುತಿವೆ
ಎದೆಯೊಳಗಿನ ಅಗ್ನಿ ದೀಪವಾಗುತ್ತಿಲ್ಲ

ಹರಿದು ಹಾರಿ ಹೋದ ಭಾವಗಳ
ಬಿಡಿಬಿಡಿಯಾಗಿ ಆರಿಸಿ ಮೂಟೆ ಕಟ್ಟಿ
ಹೊರಲಾರದೆ ಹೊತ್ತುಕೊಂಡಿರುವೆ
ತುಸು ಬಾಗಿದ ಬೆನ್ನ ಮೇಲೆ

ಅರೆಗಣ್ಣ ಮುಚ್ಚಿ ಗುರಿ ಇಲ್ಲದೆ
ಹೊರಟ ಈ ನಿರ್ಮಾನುಷ ಪಯಣ
ಕೊನೆಗಾದರೂ ಸೇರೀತೆ ತಾಣ
ಇಲ್ಲ ಭಾವ ಮೂಟೆ ಭಾರವಾಗಿ
ಬೆನ್ನ ಮೂಳೆಯ ಇಕ್ಕೆಲ ಸವೆದು
ನಡುಬೀದಿಯಲ್ಲೇ ಚೆಲ್ಲಾಪಿಲ್ಲಿಯಾಗಿ
ನಿಷ್ಕರುಣಿ ಪಾದಗಳಡಿಸಿಕ್ಕು
ಉಸಿರುಗಟ್ಟಿ ಬಿಡಬಹುದೇ ಪ್ರಾಣ