ಹುಚ್ಚು ರಭಸದಿ ಹರಿವ
ತಿಳಿ ಹಸಿರು ರಂಗಿನ
ಹೊಸ ನೀರ ತೊರೆಯ ಮೇಲೆ
ಮರುಹುಟ್ಟು ಪಡೆದಿದೆ
ಹುಟ್ಟಿನಾಸರೆಯಲಿ ಬದುಕೊಂದು
ಮೋಸ ವಂಚನೆಗಳ ಲಂಚ ರುಷುವತ್ತು
ಆಸ್ತಿ ಅಂತಸ್ತುಗಳ ಗತ್ತು ಗೈರತ್ತು
ಎಲ್ಲ ನಿರಾಶೆಗಳ ಮಿತಿಯ ಮೀರಿ
ಮನಸ ಮೂಲೆಯ ಮರದ ತುದಿಯಲಿ
ಟಿಸಿಲೊಡೆದಿದೆ ಹೊಸ ಕನಸೊಂದು
ತಿಳಿಗೊಳದೆದೆಯ ತಳಮಳದಲಿ
ನೂರು ತಲ್ಲಣವ ಬಚ್ಚಿಟ್ಟು
ಬಾಳ ಬಾಂದಳದಲಿ
ನೂರು ಭಾವಗಳ ಕಾಪಿಟ್ಟು
ಉದಿಸಿದೆ ಹೊಸ ಭರವಸೆಯೊಂದು
ಮೌನ ಕಣಿವೆಯಲಿ ಮಾತ ಮಂಟಪ ಕಟ್ಟಿ
ಬೇಸರಿಸದೆ ಹೊಳೆ ದಾಟಿಸಿ
ವಂಚನೆಯ ಸೋಂಕಿಲ್ಲದೆ
ಮುಖದ ಮೇಲೊಂದು ತಿಳಿ ನಗೆ
ಮೂಡಿಸುವವನ ಬದುಕು ಮುಳಗದಿರಲಿ