ಯಾರು ಹಿತವರು ಜಗಕೆ...?

ಬೀದಿ ಬದಿಯ ವೇಶ್ಯೆ ನಾನು
ದೇಹ ಮಾರಿಕೊಳ್ಳುವವಳು
ನೀನೋ...?
ನನ್ನ ಗಿರಾಕಿ
ಉಂಡು ಕಾಸೆಸೆಯೋ ಭಿಕಾರಿ

ಮುಖವಾಡವಿಲ್ಲ ನನಗೆ
ನನ್ನದು ತೋಳಿಲ್ಲದ ಕಪ್ಪು ರವಿಕೆ
ನಿನ್ನದೋ...?
ಸೌಜನ್ಯದ ಸುಸಂಕೃತ ಕವಚದ
ಹಿಂದಿನ ಕಪ್ಪು ಹೃದಯ

ನನ್ನ ಮನಕಿರುವುದು ಒಪ್ಪೊತ್ತಿನ ಅನ್ನದ
ಹೆತ್ತಬ್ಬೆಯ ದೇಹದ ಕೀವಿನ ಚಿಂತೆ
ನಿನ್ನ ಮನಸೋ...?
ತಿರುಳಿಲ್ಲದ ಜೊಳ್ಳು ಶಬ್ಧಗಳ
ಅಸಂಖ್ಯ ವ್ರಣಗಳ ಸಂತೆ

ಸತ್ತ ಮನಸಿನ ಒಡೆಯರಿಗೆ ಬಿಕರಿಯಾದಾಗಲೇ
ನನ್ನ ದೇಹ ಸತ್ತು ಹೋಯ್ತು
ನಿನ್ನ ಆತ್ಮವೋ...?
ಪ್ರತಿ ರಾತ್ರಿ ಸಾಯುತ್ತಲೇ ಇದೆ
ನನ್ನ ಹರಕು ಚಾಪೆಯ ಮಡಿಕೆಗಳಲಿ

ವಂಚನೆಯ ಹಂಗಿಲ್ಲದೆ ಸತ್ತು ಬದುಕುತಿರುವ ನಾನು
ಸುಭಗತನದ ಸೋಗಿನಲಿ ಬದುಕಿಯೂ ಸತ್ತಂತಿರುವ ನೀನು
ಮಧ್ಯೆ ಈ ನಿಷ್ಪಾಪಿ ಲೇಖನಿ
ಹೇಳು...
ಯಾರು ಹಿತವರು ಜಗಕೆ?