ಸಂತೆಯಲ್ಲಿ, ಗದ್ದಲದಲ್ಲಿ
ಕಳೆದುಹೋದಾಗೆಲ್ಲಾ
ನಿಶಬ್ಧ ತಾಕುತ್ತಿರುತ್ತದೆ
ಭಾವಬಿಗಿತಗಳಿಗೆಲ್ಲಾ ಸ್ಪಷ್ಟ ಹರಿವು
ನಿನ್ನೆ ಕೇಳಿದ್ದು
ಮೊನ್ನೆ ಕಂಡಿದ್ದು
ಇಂದಿಲ್ಲೇ ದಕ್ಕಿದ್ದು
ಮುಗಿಯದ ಕಥೆಗಳಿಗೆಲ್ಲಾ
ಒಂದು ಸಣ್ಣ ತಿರುವು
ಗೋರಿಯ ನೆತ್ತಿಯೊಳಗಿಂದಲೂ
ಉಕ್ಕುವ ಕೊನೆಯಿಲ್ಲದ
ಯಥೇಚ್ಛ ಜೀವನಪ್ರೀತಿ
ಒಂದಿಷ್ಟು ಅಚ್ಚರಿ ಬೆರಗುಗಳಿಗೆ
ಕಾರಣವಾಗುತ್ತದೆ
ಯಾವ ಮೂಲದಿಂದ ಜೀವ ಜೀಕುತ್ತದೋ
ಯಾವ ಕೋನದಲ್ಲಿ ಪ್ರೀತಿ ಹರಿಯುತ್ತದೋ
ಯಾವ ನೆನಪುಗಳಿಗೆ ಎಷ್ಟು ಉಮ್ಮಳಿಕೆಯೋ
ಶಬ್ಧದ ಒಡಲಾಳದ ನಿಶಬ್ಧದಷ್ಟೇ
ಅಸಂಕಲ್ಪಿತ, ಅಯೋಮಯ.
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ