ಸಮಚಿತ್ತೆ ಊರ್ಮಿಳೆ

ಇರುವಿಕೆ ಮತ್ತು ಇಲ್ಲದಿರುವಿಕೆಯ
ಮಧ್ಯಮ ಮಾಧ್ಯಮದಲ್ಲಿ
ನಿಂತು ಒಮ್ಮೆ ಗೈರಿನತ್ತ
ಮತ್ತೊಮ್ಮೆ ಅಸ್ತಿತ್ವದತ್ತ 
ದೃಷ್ಟಿ ಹಾಯಿಸಬೇಕು

ಎಷ್ಟು ಅಂತರವಿದ್ದೀತು?
ಅಜ-ಗಜಗಳ ಗುಣಾಕಾರ
ಭಾಗಾಕಾರಗಳೊಂದೂ ಲೆಕ್ಕಕ್ಕೆ ಬಾರದಿಲ್ಲಿ

ಎರಡು ಧ್ರುವಗಳ ನಡುವೆ
ತೇಲಿ ಹೋದ ತಣ್ಣನೆಯ ಗಾಳಿ
ಎಷ್ಟು ಸುನೀತ ಕನಸುಗಳ
ಮೈ ಸವರಿ ಆಸೆ ಹುಟ್ಟಿಸಿ
ಕತ್ತು ಹಿಸುಕಿ ಸಾಯಿಸಿರಬಹುದು?

ಪಂಜರದೊಳಗಿನ ಹಕ್ಕಿಗೂ
ಬಿಡುಗಡೆಯ ಆಸೆಯಿರಬಹುದು
ಅಥವಾ ಪರಾಧೀನತೆಯ ಅಸಹ್ಯ

ನಿಷಿದ್ಧ ಸಂಗತಿಗಳಿಗೂ ಒಮ್ಮೊಮ್ಮೆ

ಗೆರೆ ದಾಟುವ ಖಯಾಲಿ

ನಿಡುಸುಯ್ಯುವ ಊರ್ಮಿಳೆಯ

ಉಸಿರನು ತಾಕುವ ಎದೆಗಾರಿಕೆ

ಈ ಜಗದ ಯಾವ ಲೆಕ್ಕಾಚಾರಕ್ಕಿದ್ದೀತು?

ಬಿಡಿ, ಎಲ್ಲಾ ಇರುವಿಕೆ ಮತ್ತು

ಇಲ್ಲದಿರುವಿಕೆಗಳ ಮಧ್ಯೆ 

ತಣ್ಣಗೆ ಬೆಳಗುವ ಸಮಚಿತ್ತೆ ಊರ್ಮಿಳೆ.