ಎದೆಯ ಪಕ್ಕದಲಿ ಹರಿವ
ನದಿಯಲೀಗ ನೂರು ಪುಳಕ
ಸ್ವಪ್ನ ಲೋಕದ ಜರೂರತ್ತಿಗೆಲ್ಲಾ
ಸುಸ್ಪಷ್ಟ ಹಾಸುಗಲ್ಲು
ಎಲ್ಲೋ ಕಟ್ಟಿದ ಮೋಡ
ಇಲ್ಲಿ ಸುರಿದ ಮಳೆ
ಮತ್ತೆಲ್ಲೋ ಬೀಸಿದ ಗಾಳಿ
ಗರಿಕೆಯ ಗರ್ಭದಲ್ಲೂ ಖುಶಿಯ ಹೊನಲು
ಸಂಜೆ ಮುಗಿಲಿನ ಹಾಡಲೊಳಗೀಗ
ರಾಗ ತಾಳಗಳಾಚೆಗಿನ ಭಾವಸಂಭ್ರಮ
ಕೆನೆಗಟ್ಟಿದ ಹಾಲಿನ ಪ್ರತಿ ಕಣಕೂ
ಬಿದಿಗೆ ಚಂದ್ರಬಿಂಬದ ಬೆರಗು
ಬಂಡಾಯ ಪದ್ಯದಂತರಂಗದಲೂ
ನವಿರು ಪ್ರೇಮ ಸ್ಫುರಣೆ
ಪ್ರೀತಿ ಅಜರಾಮರ ಎಂದ ಕವಿಯೀಗ
ಹೊಸ ಪುಕ್ಕ ಕಟ್ಟಿಕೊಂಡ ಹಕ್ಕಿ
ನೆರಳು ನೀರಾಗುವ ಸುಸಮಯದಿ
ಕನಸುಗಳಿಗೆ ನವ ಜೀವ ಪ್ರಾಪ್ತಿ
ತೆರೆ ಮರೆಯ ಕವಿತೆಗೂ
ನವಿಲಾದ ಜಯೋತ್ಕರ್ಷ.
ಕಾಮೆಂಟ್ಗಳಿಲ್ಲ:
ಕಾಮೆಂಟ್ ಪೋಸ್ಟ್ ಮಾಡಿ