ಗೋಡೆ

ಮೌನದ ಮುದ್ರೆ ಹೊತ್ತ
ನಿಸ್ತೇಜ ಗೋಡೆಯ ಅಂಚಿನ
ಸುಮ್ಮನೆ ನಗುವ ಸ್ತಬ್ಧಚಿತ್ರ
ಆಗೊಮ್ಮೆ ಈಗೊಮ್ಮೆ ಕದಲುತ್ತಿರುತ್ತದೆ

ಸುರಿವ ಮಳೆಗೆ ಮುಖವೊಡ್ಡಿ
ಜಗದ ಅರೆಕೊರೆಗಳಿಗೆ ಸ್ಪಂದಿಸುವ
ಆ ಹೃನ್ಮನಸಿಗೂ ಒಮೊಮ್ಮೆ
ಕತ್ತಲು ಕವಿಯುತ್ತದೆ

ನಿಶ್ಚಲ ಸಂಜೆಯ ದೀರ್ಘ ಮೌನಕ್ಕೆ
ಚಿತ್ರದ ಜೀವಝರಿಯೂ
ಜುಮ್ಮೆನ್ನುತ್ತದೆ
ಸುತ್ತೆಲ್ಲಾ ಗಾಢ ಅಂಧಕಾರ

ಆ ಕತ್ತಲ ಅಸ್ತಿತ್ವದಾಚೆಗೂ
ನಕ್ಷತ್ರದ ಮಡಿಲಿನಲಿ
ಅರಳುವ ಹಾಲ್ಬೆಳಕ ಕೂಸಿನ
ಕನಸಿಗೆ ಕಾಳಿರುಳೂ ಮಬ್ಬಾಗುತ್ತದೆ

ಅಷ್ಟಿಷ್ಟು ಮಿಂಚಿ ಅಲ್ಲೆಲ್ಲೋ ಹೊಳೆದು
ನಿಶೆಯ ಜಡವನು ತೊಳೆವ
ಮಿಂಚು ಹುಳುವಿನ
ಬದುಕಿನೊಂದಿಗಿನ ತೀವ್ರ ಹಂಬಲಕೆ

ಎದೆಯ ದುಗುಡವ ಮರೆತು
ಉದ್ವಿಗ್ನ ಆತ್ಮಕೆ
ಒಂದಿಷ್ಟು ಭರವಸೆ ತುಂಬಿ
ಸ್ತಬ್ಧಚಿತ್ರ ಮತ್ತೆ ನಗುತ್ತದೆ

ನಿಸ್ತೇಜ ಗೋಡೆಯ ಮೊಗದಲೂ
ಕಿರು ಮಂದಹಾಸ.