ಹೊಸ ಜೀವ ಸಂಚಾರ

ಬಲಗೆನ್ನೆಯ ಮೇಲಿನ
ಕಂಡೂ ಕಾಣದಂತಿರುವ
ಪುಟ್ಟ ಮಚ್ಚೆ ಏನನ್ನೋ
ಬೇಡುತ್ತಿರುವಂತಿದೆ ಎಂದನಾತ

ಒಂದಿಷ್ಟು ಯೋಚಿಸಿ, ತಲೆಕೆರೆದು
ಮಲಗಿದವಳಿಗೋ ಗಾಢ ನಿದ್ದೆ
ಮುಗಿಯದ ಕನಸಿನ ಪೂರ್ತಿ
ಮುಗಿಲು ಬಿರಿವ ಮಳೆಯ ಸದ್ದು

ಅಲ್ಲಿ ಅವನ ಕಣ್ಣಲಿ
ಮಚ್ಚೆಯ ಮೇಲೊಮ್ಮೆ
ಬೆಚ್ಚನೆಯ ಅಂಗೈ ಸವರಿ
ಪುಟ್ಟ ಬೊಟ್ಟಿಟ್ಟ ಕನಸು

ಕನಸಿಗೂ ನನಸಿಗೂ ಎಷ್ಟು ಹೊತ್ತು?
ಕೂಡಿಸಿ ಕಳೆದು ಗುಣಿಸೋ
ಲೆಕ್ಕ ಬಾರದವಳ ಪೇಚಾಟ
ಕಂಡು ಕನ್ನಡಿಗೂ ಹುಸಿನಗು

ಕಿವಿಯ ಪಕ್ಕದಲಿ ಕದಪುಗಳ
ಅವುಚಿಕೊಂಡಿರುವ ತುಂಟ
ಮುಂಗುರುಳು ಅವಳ
ತುದಿ ಮೂಗನು ತೀಡಿದಂತೆಲ್ಲಾ

ಮಚ್ಚೆಯ ಜೀವಾತ್ಮದೊಳಗೆ
ಅವನ ಬಿಸಿಯುಸಿರ ಸ್ಪರ್ಶದ ತವಕ
ಅಲ್ಲವನ ಪ್ರತಿ ನರನಾಡಿಯಲೂ
ಹೊಸ ಜೀವಸಂಚಾರದ ಪುಳಕ.