ಕಣ್ಣ ಚಿಟ್ಟೆಯ ರೆಕ್ಕೆ

ಇಲ್ಲೇ ಮೂಲೆಯಲ್ಲಿ
ಸುರುಳಿ ಸುತ್ತಿಟ್ಟ
ಬೊಚ್ಚು ಬಾಯಿಯ ನಿಷ್ಕಳಂಕ
ನಗುವೊಂದು ಕಾಣೆಯಾಗಿದೆ

ನಿನ್ನೆ ಮೊನ್ನೆಯಷ್ಟೆ ನನ್ನ
ಮನದ ಜೋಳಿಗೆಯಲಿ
ಬೆಚ್ಚಗಿತ್ತು
ಕಚಗುಳಿಯಿಡುತ್ತಿತ್ತು

ಇಂದಿಲ್ಲವೆನ್ನುವ ನಿಚ್ಚಳ ದಿಟದಲಿ
ನಿನ್ನೆ ಮೊನ್ನೆ ನಾಳೆಗಳೆಲ್ಲಾ
ಬರಿ ಕಲ್ಪನೆ ಕನವರಿಕೆಗಳ
ಮಿಥ್ಯ ಮಾಲೆಯಾಗುತ್ತಿವೆ

ಪಟ ಪಟ ಬಡಿಯುತ್ತಿದ್ದ
ಕಣ್ಣ ಚಿಟ್ಟೆಯ ರೆಕ್ಕೆಯೀಗ
ಕಳಚಿಬಿದ್ದಿದೆ
ಹನಿ ರಕ್ತದಲಿ ಬ್ರಹ್ಮಾಂಡ ನೋವು

ಖಾಲಿ ಜೋಳಿಗೆಯ ಇಂಚಿಂಚಲೂ
ನೀವು ತುಂಬಿರುವ ತಿರಸ್ಕಾರ
ಪಕ್ಕೆಲುಬಿನ ಪಕ್ಕದಲೇ ಹರಿದು
ಹೃದಯ ಸೇರಿದೆ

ತುಡಿತ ಮಿಡಿತವೊಂದೂ
ಸಂವೇದನೆ ಉಳಿಸಿಕೊಂಡಿಲ್ಲ
ನಿಷ್ಕ್ರಿಯ ಗುಂಡಿಗೆಯ ಆಲಾಪವ
ಒಮ್ಮೆ ಆಲಿಸಿ ನೋಡಿ

ಇರುವ ರಕ್ತವ ಬಸಿದು
ಉರಿವ ಉಸಿರನು ಬಿಗಿಹಿಡಿದು
ನಿಮಗೆ, ನಿಮ್ಮ ತಿರಸ್ಕಾರಕೆ
ಕೃತಜ್ಞತೆ ಅರ್ಪಿಸುತಿದೆ
ಆಲಿಸಿ ಧನ್ಯರಾಗಿ