ತೋಳಮೇಲಿನ ಮಚ್ಚೆ

ತೋಳಮೇಲಿನ ಮಚ್ಚೆಯ
ಪ್ರೀತಿಸಲು ಕಲಿತಿರುವೆ
ಹಸಿರುಗಟ್ಟಿದ ನೋವ ಕಲೆ
ಅಸಹನೀಯ ಅನಿಸುತ್ತಿಲ್ಲ ಈಗ

ಕತ್ತಲೆ ಹೊತ್ತು ತರುವ
ಬೆಳಕು ಮುದ ನೀಡುತ್ತಿದೆ
ಬೆಳಕ ಹಿ೦ದೆ ಬರುವ ಕತ್ತಲು
ಮತ್ತೆ ಭರವಸೆ ಮೂಡಿಸುತಿದೆ

ಬಾಳ ಹೊತ್ತಗೆಯಲಿ ಸರಿದು ಹೋದ
ಪುಟವ  ಸದ್ದಿಲ್ಲದೆ ತಿರುವಿದರೆ
ತುಟಿಯ೦ಚಲಿ ಮೆಲ್ಲನೆ
ನಸು ನಗೆಯೊಂದು ಹಾಯುತ್ತದೆ

ನಿರುತ್ಸಾಹವೆಂಬ ನಿರಾಕರಣೆಯ
ಅಡಿಗಡಿಗೆ ನಾ ತೋರಿದರೂ
ಸಹನೆಯ ಬಡಿಗೆಯಿಂದ ಬಡಿದು
ಗಟ್ಟಿಗೊಳಿಸಿದ ವಿಧಿಯೇ ನಿನಗೆ ಶರಣು